01وش هو مساعد
بوت إشراف مستقل لديسكورد، غير تابع لشركة Discord، وله لوحة تحكم (dashboard.musaed.dev) تدير منها إعدادات سيرفرك بدل الأوامر النصية. نقدّمهم كما هم، وما نضمن إنهم بيشتغلون بدون توقف أبداً، لأن أي خدمة تقنية ممكن تتعطل. استخدامك لهم يخضع أيضاً لـ شروط Discord.
02مين يقدر يستخدمه
لازم يكون عمرك يستوفي حد ديسكورد الأدنى بمنطقتك، وتحتاج صلاحية
Manage Server على الأقل عشان تضيف البوت أو تدير سيرفرك
من اللوحة.
03تسجيل الدخول بلوحة التحكم
اللوحة تسجّل دخولك بحساب ديسكورد الخاص فيك. بدخولك فيها، انت موافق إننا نتحقق من هويتك وعضويتك بالسيرفرات اللي تديرها. التفاصيل في سياسة الخصوصية. ما نضيفك لأي سيرفر ولا نغيّر شي فيه إلا اللي تغيّره انت بنفسك.
04القرارات اللي تعتمد عليك أنت، مو علينا
مساعد أداة بس. لو فعّلت بوابة عمر الحساب، الكابتشا، قناة الفخ، أو الكلمات المختصرة وضبطت إعداداتها (من البوت أو اللوحة)، القرارات اللي تصير (طرد، رفض دخول، كتم، حظر) مسؤوليتك أنت كمشرف، مو مسؤوليتنا. إحنا بنينا الأداة، وانت تقرر متى وكيف تستخدمها.
فيه ميزتين شغالة من أول ما تضيف البوت، بدون ما تفعّلها. الأولى الحماية من التخريب: تسحب رتب أي أحد يحذف قنوات أو رتب، أو يحظر أو يطرد أعضاء بالجملة. والثانية قائمة كلمات مساعد: تحذف أي رسالة فيها كلمة من قائمة كلمات مسيئة اختارها فريقنا. تقدر تطفي أي وحدة منهم من لوحة التحكم، ولو خليتها شغالة فهي مثل أي إعداد ثاني بسيرفرك، وقراراتها مسؤوليتك.
القائمة مو دقيقة 100%، وممكن تحذف رسالة ما يشوف الأعضاء إنها تستاهل الحذف. ولو الحماية من التخريب أوقفت أحد بالغلط، التنبيه اللي يوصل الإدارة فيه الرتب اللي انسحبت منه عشان ترجعونها له.
05رسائل نرسلها إحنا
فريقنا يقدر يرسل رسالة لكل سيرفر فيه البوت، أو رسالة خاصة لكل عضو بسيرفر معيّن لو احتجنا نوصّل خبر يهمهم كلهم — كل الأعضاء، سجّل دخول باللوحة قبل كذا أو لا. الرسالة توصلك عن طريق ديسكورد مباشرة، وما لها علاقة بتسجيل الدخول أو أي موافقة تسويها باللوحة. هذا شي نسويه إحنا مباشرة، ومختلف عن أي رسالة يضبطها أدمن سيرفرك زي الترحيب أو الردود التلقائية. نستخدمه نادراً ولأشياء تستاهل، مو للتسويق ولا الإزعاج.
06المحتوى اللي تسويه أنت
بعض ميزات مساعد تخليك تكتب نص مخصص: رسالة الترحيب، رد الكابتشا، رسالة فتح التذكرة، أو كلمة الاختصار وشرحها. وبعضها تقدر ترفق فيها صورة أو ملف. هذا المحتوى من كتابتك أو رفعك أنت، مو من مساعد، وإحنا ما نراجعه ولا نتحكم فيه. أي محتوى مسيء أو مخالف أو غير قانوني تحطه بهذي الحقول، نص كان أو صورة أو ملف، مسؤوليتك أنت، مو مسؤوليتنا.
07استخدام مقبول
لا تستخدم البوت أو اللوحة لمخالفة قوانين أو شروط ديسكورد، لا تحاول تستغل ثغرة فيهم أو تعطل سيرفرات ثانية، ولا تتحايل على ميزات الحماية بقصد الإضرار بأحد. لو سويت شي من هذا، نقدر نوقف وصولك للوحة أو نسحب البوت من سيرفرك بدون إنذار مسبق.
08حدود مسؤوليتنا
ما نتحمل مسؤولية ضرر صار بسبب إعداد خاطئ سويته، أو توقف مؤقت بالخدمة، أو قرار إشرافي اتخذه أحد عبر البوت أو اللوحة. لو صار خلل تقني فعلي من طرفنا، بنحاول نصلحه بأسرع وقت.
09سياسة الاسترداد
ما فيه دفع فعلي على مساعد الحين. باقة برو تنعطى من فريقنا مباشرة، مو عبر عملية شراء داخل اللوحة. يعني ما فيه شي يُسترد لأنه ما فيه شي انخصم أصلاً. لو أضفنا دفع فعلي بعدين، بنحدث هذي الصفحة ونذكر سياسة الاسترداد كاملة قبل ما يطلق، مو بعده.
10تعديلات
ممكن نضيف ميزة، نعدّل وحدة، أو نشيلها من البوت أو اللوحة بدون إشعار مسبق. لو استمريت تستخدم أي منهم بعد التحديث، معناها موافق عليه.
11إزالة البوت
تقدر تحذفه من سيرفرك أي وقت، ونفس الشي لو حبيت توقف استخدام اللوحة. بعدها، بياناتك تخضع لـ سياسة الخصوصية.
12القانون المعمول به
أنظمة المملكة العربية السعودية، مع مراعاة أي حق يكفله لك نظام حماية البيانات الشخصية أو غيره بمكان إقامتك.
13التواصل
عندك سؤال؟ abdulilahalaniz@gmail.com