01وش نجمع من سيرفرك، وليش
مساعد يحتاج يحفظ أشياء بسيطة عشان يشتغل صح. نجمعها إما لأنك وافقت عليها وقت تضيف البوت أو تسجل دخول، أو لأنها لازمة عشان نقدر نشغّل لك الخدمة اللي طلبتها أصلاً:
- إعدادات سيرفرك: رسالة الترحيب والوداع، الكلمات الممنوعة، الحد الأدنى لعمر الحساب، أو الكلمات المختصرة اللي يحددها الأدمن لو فعّلوا هذي الميزات
- سجل الإجراءات الإشرافية: مين طرد أو حظر أو حذّر، متى، وليش، عشان يكون فيه سجل ترجعون له
-
معرّف حسابك (
user_id): مو اسمك ولا صورتك، بس الرقم اللي ديسكورد يعرفك فيه
ما نخزن نص رسائلك بقاعدة بياناتنا أبداً. فلتر الكلمات الممنوعة يفحص الرسالة لحظياً، ويفحصها مرة ثانية لو انعدّلت بعد ما انرسلت، وما يحتفظ بشي. سجل الأحداث (تحت) ينقل نص الرسالة لقناة داخل سيرفرك، بس ما يحفظه عندنا.
02ميزات تتصرف لحالها
بعض ميزات مساعد تاخذ القرار بنفسها، وما يراجعه أحد قبل ما يصير:
- بوابة العمر تطرد الحساب اللي عمره أقل من الحد
- الكابتشا تطرد اللي يغلط أكثر من المسموح
- قناة الفخ تكتم أو تطرد أو تحظر اللي يكتب فيها
- الحماية التلقائية تحذف الرسالة اللي فيها كلمة ممنوعة، وتكتم اللي يرمي سبام
- الحماية من التخريب تسحب رتب اللي يخرّب السيرفر
نسوي هذا عشان نحمي السيرفر وأعضاءه من السبام والتخريب والحسابات الوهمية. الأساس هنا مصلحة مشروعة، واللائحة التنفيذية لنظام حماية البيانات الشخصية تعدّ حماية الشبكات وأمن المعلومات من المصالح المشروعة.
أدمن السيرفر يقدر يطفي أي ميزة منها من لوحة التحكم. ميزتين بس شغالة من أول ما ينضاف البوت، حتى لو ما فعّلها أحد: الحماية من التخريب، وقائمة كلمات مساعد (كلمات مسيئة اختارها فريقنا، وتشتغل مع كلمات السيرفر). لو طاح عليك قرار تشوفه غلط، كلّم إدارة السيرفر، هم اللي يقدرون يرجعون لك رتبك أو يفكون الحظر. وتقدر تتواصل معنا بعد.
- الحماية من التخريب: تقرا سجل التدقيق حق السيرفر (Audit Log) عشان تعرف مين حذف قناة أو رتبة، أو حظر أو طرد أعضاء. تعدّ إجراءات كل شخص بذاكرة البوت بس، مو بقاعدة البيانات. لو أحد وصل للحد تسحب رتبه، أو تطرده أو تحظره لو الأدمن اختار كذا، والبوت اللي يخرّب ينطرد. بعدها ترسل للإدارة تنبيه فيه اسمه والرتب اللي انسحبت، وينكتب الإجراء بسجل الإجراءات. وما تعدّ عليه شي لمدة 24 ساعة بعدها. هذي بعد محفوظة بالذاكرة، وتنمسح لو البوت أعاد التشغيل
- سجل الأحداث: لو الأدمن فعّله، مساعد ينقل للقناة اللي يختارها نص أي رسالة تنحذف، ونص الرسالة قبل وبعد التعديل، ودخول الأعضاء وخروجهم، وتغيير رتبهم وأسمائهم، والقنوات والرتب اللي تنشأ أو تنحذف. يشوفها كل أحد يقدر يدخل القناة، والأدمن هو اللي يحدد مين. رسايل البوتات ما تنسجل. ما نحفظ نسخة عندنا: نص الرسالة المحذوفة ناخذه من نسخة مؤقتة يحتفظ فيها البوت بذاكرته، وتروح لو أعاد التشغيل. واللي ينكتب بقناة السجل يبقى بديسكورد، وحذفه بيد إدارة السيرفر، مو بيدنا
- التنبيهات: أمر /checkup والفحص الدوري ينبّهون الإدارة لو ميزة مفعّلة تعطّلت، مثل رتبة انحذفت أو صلاحية ناقصة. نحفظ بس بصمة للمشكلة عشان ما نكرر نفس التنبيه. ولو قناة الفخ ما قدرت تعاقب أحد، التنبيه يذكر مين هو عشان الإدارة تتصرف
03لو سجّلت دخول بلوحة التحكم
لوحة التحكم طريقة ثانية تدير فيها سيرفرك من المتصفح بدل أوامر ديسكورد. لما تدخلها بحساب ديسكورد، نشوف اسمك وصورتك ومعرّفك عشان نعرف مين داخل، وقائمة السيرفرات اللي فيها انت وفيها مساعد عشان نعرض لك بس اللي تقدر تديرها. نسجّل وقت آخر دخول لك للمحافظة على الجلسات آمنة.
ولو ربطت إيميلك بحساب ديسكورد، نحفظه أيضًا. نستخدمه لثلاث أشياء بس: نرسل لك تنبيه لو انتهت باقة برو بسيرفرك، ولازم يكون موجود عشان تقدر تفعّل «الوصول المبكر» لسيرفرك (برنامج تجربة ميزات قبل ما تطلق للكل)، ولو أوقفته نرسل لك تأكيد. غير كذا، ما نستخدمه لأي شي. الإيميل مربوط بحسابك انت، مو بالاشتراك نفسه، فلو انتهى الاشتراك يبقى محفوظ عندنا عشان ما تحتاج توافق عليه من جديد لو رجعت تشترك.
لو انت أدمن أو مسؤول بسيرفرنا الرسمي، نتحقق من رتبتك هناك عشان نحدد وصولك للوحة. التحقق يصير من طرفنا، ما نطلب منك صلاحية إضافية عشانه.
الجلسة تنتهي تلقائياً بعد فترة، بدون ما تسوي شي.
04وين تُحفظ
على قاعدة بيانات (Railway)، وكل سيرفر بياناته معزولة تماماً عن أي سيرفر ثاني. تقنياً، مو بس وعد.
05متى تنمسح
لو حذفت البوت، بياناته ما تروح فوراً. فيه فترة سماح قبل الحذف النهائي، عشان لو رجّعته بالغلط أو غيرت رايك ترجع إعداداتك زي ما كانت. بعدها تنحذف تلقائياً ونهائياً.
لو انتهت باقة برو بسيرفرك، السيرفر يرجع للباقة المجانية فورًا. ما ينحذف منه شي، لا تذكرة ولا اختصار ولا رد تلقائي ولا أي إعداد. اللي يتغيّر بس الحدود: أي زيادة فوق الحد المجاني توقف مؤقتًا وتفضل محفوظة زي ما هي، وترجع تشتغل بنفسها لو رجعت لبرو. بعد 21 يوم من الانتهاء نحذف سجل الاشتراك نفسه بس، وسيرفرك يكمل شغال عادي.
سجلات الإجراءات الإشرافية تنحفظ فترة أطول شوي كسجل تاريخي، وبعدها تنمسح هي كمان. جلسات لوحة التحكم تنمسح تلقائياً بعد ما تنتهي صلاحيتها.
06لو صار تسريب
لو صار خلل أمني وانكشفت بياناتك بشكل ممكن يضرك، نخبرك بأقرب وقت ونقول لك وش صار بالضبط ووش سوّينا عشان نصلحه. هذا التزام علينا سواء ذكرناه هنا أو لا، بس حبينا تعرف إنه موجود.
07حقوقك
تبي تعرف وش محفوظ عنك؟ تواصل معنا. تبي تصححه لو فيه شي غلط، زي اسم قديم ما تحدث؟ نفس الشي. تبي تحذفه؟ احذف البوت، أو تواصل معنا مباشرة. هذا يشمل إيميلك لو تبي نمسحه من حسابك بدون ما تحذف البوت. عندك سؤال ثاني؟ نفس الشي.
مساعد مشروع مستقل يديره فرد وحدة، مو شركة مسجّلة. كل التواصل يصير من نفس الإيميل:
تواصل: abdulilahalaniz@gmail.com
08ميزات جديدة مستقبلاً
لو أضفنا ميزة تحتاج تجمع شي إضافي، بنحدث هذي الصفحة ونذكره هنا قبل ما تنطلق، مو بعدها.
09شي أخير
ما نبيع بياناتك، وما نشاركها مع أي جهة لأغراض تسويقية. فيه بس خدمتين من برا نستخدمهم: وحدة ترسل الإيميلات نيابة عنا (زي تنبيه انتهاء برو أو تأكيد إيقاف الوصول المبكر)، ووحدة تراقب الأخطاء لو صار خلل بالسيرفر — تشوف تفاصيل الخطأ وعنوان IP الطلب بس، مو محتوى سيرفرك ولا جلستك ولا إيميلك. قاعدة البيانات نفسها وهالخدمتين كلها برا السعودية، لأن مساعد مشروع صغير ما عنده سيرفرات جوّا. غير كذا، ما نجمع أكثر من اللي نحتاجه فعلاً. أي تغيير جوهري بالسياسة بتلقاه هنا مع تاريخ محدث فوق.